📍 बाळापूर (अकोला) | प्रतिनिधी
भारतीय बौद्ध महासभेच्या वतीने आयोजित महापरित्राण पाठ व महासंघदान परिषद आज बाळापूर येथे अत्यंत उत्साहात व शिस्तबद्ध वातावरणात यशस्वीपणे पार पडली. या ऐतिहासिक परिषदेच्या निमित्ताने परिसरात बौद्ध अनुयायांमध्ये मोठा उत्साह दिसून आला.
या परिषदेला बाळासाहेब आंबेडकर, राष्ट्रीय अध्यक्ष – वंचित बहुजन आघाडी यांची प्रमुख उपस्थिती लाभली. त्यांनी बौद्ध धम्म, सामाजिक न्याय, समता आणि वंचितांच्या राजकारणावर उपस्थित अनुयायांना सखोल व प्रेरणादायी मार्गदर्शन केले. धम्म, संघ आणि संविधानाच्या मार्गावर चालण्याचा संदेश देत त्यांनी समाजातील प्रत्येक घटकाला संघटित होण्याचे आवाहन केले.
या कार्यक्रमाला भारतीय बौद्ध महासभा चे अध्यक्ष पी. जी. वानखेडे, वंचित बहुजन आघाडी चे अकोला जिल्हाध्यक्ष प्रमोद देंडवे, तसेच गजानन गवई यांच्यासह अनेक मान्यवर, भिक्षू संघ, कार्यकर्ते व बौद्ध उपासक-उपासिका मोठ्या संख्येने उपस्थित होते.
महापरित्राण पाठ व महासंघदान कार्यक्रमात सामूहिक धम्मपाठ, संघदान आणि धम्मपर प्रवचनाचे आयोजन करण्यात आले. उपस्थित बौद्ध अनुयायांनी मोठ्या श्रद्धेने सहभाग नोंदवला.
धम्म, संघ आणि संविधानाच्या मार्गावर चालणारी ही परिषद म्हणजे वंचित बहुजनांच्या आत्मसन्मानाची साक्ष असल्याचे मत अनेक वक्त्यांनी व्यक्त केले. कार्यक्रमाची सांगता शांततामय आणि प्रेरणादायी वातावरणात झाली.