बारूळ : येथील ज्येष्ठ शिवव्याख्याते, पुरोगामी विचारवंत आणि सामाजिक-धार्मिक कार्यातील अग्रणी व्यक्तिमत्त्व मधुकर निवृत्ती कदम (वय 54) यांचे दि. 31 मार्च 2026 रोजी दुर्दैवी अपघातात निधन झाले. नांदेड येथे शिव कुटुंब मेळावा कार्यक्रम आटोपून परत येत असताना माता रमाई चौक सिडको (ढवळे कॉर्नर )परिसरात टिप्पर (क्र. MH 26 CH 4386) वाहनाने धडक दिल्याने त्यांचा जागीच मृत्यू झाला.
त्यांच्या आकस्मिक निधनामुळे बारूळ परिसरात शोककळा पसरली असून विविध क्षेत्रांतून हळहळ व्यक्त होत आहे. कदम हे बारूळ येथील विठ्ठल-रुक्मिणी व हनुमान मंदिर संस्थांचे अध्यक्ष म्हणून कार्यरत होते. त्यांनी आपल्या प्रभावी वक्तृत्वातून समाजप्रबोधन करत अनेकांना दिशा दिली होती. सामाजिक, धार्मिक व वैचारिक क्षेत्रात त्यांचे मोठे योगदान होते.
त्यांच्या पश्चात पत्नी, दोन मुले, एक मुलगी व नातवंडे असा परिवार आहे. त्यांच्या मुलांपैकी एक पोलीस उपनिरीक्षक, तर दुसरा विक्रीकर निरीक्षक म्हणून कार्यरत असून मुलगी शिक्षिका आहे.
त्यांच्यावर दि. 1 एप्रिल 2026 रोजी सकाळी 11 वाजता बारूळ येथे अंत्यसंस्कार करण्यात येणार आहेत.