प्रतिनिधी :- प्रकाश गवारे
आखाडा बाळापूर भारत फायनान्स इन्क्लुजन लिमिटेड तसेच IndusInd Bank यांच्या सहकार्याने कार्यरत असलेल्या गजानन काळे यांनी आपल्या प्रदीर्घ सेवाकाळात उल्लेखनीय कामगिरी बजावत संस्थेचा लौकिक वाढविला. तब्बल ८ वर्षे ८ महिने २० दिवस त्यांनी कंपनीच्या आचारसंहितेचे व नियमांचे तंतोतंत पालन करत प्रामाणिकपणे, निष्ठेने व कर्तव्यदक्षतेने सेवा बजावली. त्यांच्या या समर्पित कार्याचा गौरव करण्यासाठी आखाडा बाळापूर येथील शाखेत भावपूर्ण निरोप समारंभाचे आयोजन करण्यात आले.
गजानन काळे यांनी आपल्या कार्यकाळात कंपनीच्या उद्दिष्टांनुसार ग्रामीण व शहरी भागातील ग्राहकांशी सुसंवाद साधत आर्थिक समावेशनाच्या कार्यात मोलाचा वाटा उचलला. ग्राहकांप्रती असलेली त्यांची बांधिलकी, वेळेचे काटेकोर नियोजन आणि प्रामाणिक कार्यपद्धती यामुळे शाखेची प्रगती साधण्यात त्यांचा मोठा हातभार लागला. त्यांनी प्रत्येक जबाबदारी अत्यंत दक्षतेने पार पाडत सहकाऱ्यांमध्ये विश्वास आणि आपुलकीचे नाते निर्माण केले.
कंपनीच्या नियमानुसार आवश्यक नोटीस पिरियड पूर्ण करून त्यांनी सेवेतून निवृत्ती स्वीकारली. त्यांच्या निरोप समारंभात शाखेतील सर्व अधिकारी, कर्मचारी व सदस्य मोठ्या संख्येने उपस्थित होते. कार्यक्रमात BM सुनील जाधव, BCM के. सिध्देश्वर, CRO गोविंद चितळकर, राणी कराळे मॅडम तसेच सर्व संगम मॅनेजर व कर्मचारी उपस्थित होते.
यावेळी मान्यवरांनी गजानन काळे यांच्या कार्याचा आढावा घेत त्यांच्या प्रामाणिकपणा, सचोटी व समर्पणाची प्रशंसा केली. “कंपनीशी निष्ठा राखत नियमांचे पालन करत काम कसे करावे, याचे उत्तम उदाहरण म्हणजे गजानन काळे,” अशा शब्दांत त्यांचा गौरव करण्यात आला. त्यांच्या सहकार्यशील स्वभावामुळे शाखेत नेहमीच सकारात्मक वातावरण राहिले, अशी भावना सहकाऱ्यांनी व्यक्त केली.
कार्यक्रमादरम्यान शाल, श्रीफळ व पुष्पगुच्छ देऊन त्यांचा सत्कार करण्यात आला. पुढील आयुष्यासाठी उत्तम आरोग्य, यश व आनंद लाभावा, अशा शुभेच्छा उपस्थितांनी दिल्या. गजानन काळे यांच्या कार्याची आठवण शाखेसाठी नेहमीच प्रेरणादायी ठरेल, असा विश्वास व्यक्त करत समारंभाची सांगता करण्यात आली.