ठाणे प्रतिनिधी :- माया खिल्लारे
20 जून 1946 हा दिवस भारतीय शिक्षण आणि सामाजिक परिवर्तनाच्या इतिहासातील सुवर्णक्षण ठरला. भारतरत्न डॉ. बाबासाहेब आंबेडकर यांनी मुंबईत सिद्धार्थ महाविद्यालयाची स्थापना करून शिक्षणापासून वंचित असलेल्या लाखो विद्यार्थ्यांसाठी ज्ञानाची कवाडे खुली केली.
स्वातंत्र्यपूर्व काळात उच्च शिक्षण हे समाजातील मोजक्याच घटकांपुरते मर्यादित होते. मात्र, शिक्षण हेच सामाजिक गुलामगिरीतून मुक्त होण्याचे प्रभावी साधन असल्याचा ठाम विश्वास बाबासाहेबांनी बाळगला. याच विचारातून सिद्धार्थ महाविद्यालयाची निर्मिती झाली आणि समाजातील दुर्लक्षित, शोषित व वंचित घटकांना नवी दिशा मिळाली.
सिद्धार्थ महाविद्यालयाने गेल्या अनेक दशकांत हजारो विद्यार्थी, अधिकारी, न्यायाधीश, प्राध्यापक, लेखक आणि सामाजिक कार्यकर्ते घडवले. ज्ञान, समता आणि स्वाभिमानाची मूल्ये रुजवणारी ही संस्था आजही बाबासाहेबांच्या परिवर्तनवादी विचारांचा वारसा पुढे नेत आहे.
एका महाविद्यालयाच्या स्थापनेने केवळ विद्यार्थ्यांचेच नव्हे, तर संपूर्ण समाजाचे भविष्य बदलू शकते, याचे जिवंत उदाहरण म्हणजे सिद्धार्थ महाविद्यालय. शिक्षणाच्या माध्यमातून सामाजिक क्रांती घडवून आणणाऱ्या या ऐतिहासिक कार्याला आज स्थापना दिनानिमित्त अभिवादन करण्यात येत आहे.
“शिक्षण हेच स्वातंत्र्य, स्वाभिमान आणि प्रगतीचे सर्वात प्रभावी शस्त्र आहे” — डॉ. बाबासाहेब आंबेडकर