ठाणे प्रतिनिधी : माया खिल्लारे
आज 19 फेब्रुवारी रोजी छत्रपती शिवाजी महाराजांची जयंती राज्यभर उत्साहात साजरी केली जात आहे. यानिमित्ताने महान समाजसुधारक महात्मा ज्योतिराव फुले यांनी शिवाजी महाराजांचे कार्य समाजातील सर्वसामान्यांपर्यंत पोहोचविण्यासाठी केलेल्या योगदानाची विशेष आठवण केली जात आहे.
महात्मा फुले यांनी शिवाजी महाराजांना रयतेचे खरे राजे म्हणून गौरवले. त्यांनी शिवाजी महाराजांचे कार्य केवळ एका समाजापुरते मर्यादित न ठेवता बहुजन समाजासाठी प्रेरणादायी ठरविले. 1869 मध्ये महात्मा फुले यांनी रायगड किल्ल्यावर जाऊन शिवाजी महाराजांच्या समाधीचा शोध लावला आणि तिची स्वच्छता व जतन करण्याचे काम केले. त्या काळात शिवाजी महाराजांच्या समाधीकडे दुर्लक्ष झाले होते.
महात्मा फुले यांनी शिवाजी महाराजांवर पोवाडा लिहून त्यांच्या पराक्रमाची आणि लोककल्याणकारी राज्यकारभाराची माहिती सर्वसामान्य जनतेपर्यंत पोहोचवली. त्यांनी शिवाजी महाराजांचे चित्रण सामाजिक न्याय, स्त्री सन्मान, शेतकरी व दुर्बल घटकांचे रक्षण करणारे आदर्श शासक म्हणून केले.
शिवाजी महाराजांची जयंती साजरी करण्याची परंपरा सुरू करण्यामागेही महात्मा फुले यांचे मोठे योगदान मानले जाते. त्यांनी शिवजयंती हा उत्सव बहुजन समाजाच्या स्वाभिमान आणि प्रेरणेचा दिवस म्हणून साजरा करण्याचा संदेश दिला.
आजच्या दिवशी राज्यभर विविध ठिकाणी मिरवणुका, अभिवादन कार्यक्रम, व्याख्याने आणि सांस्कृतिक उपक्रम आयोजित करण्यात येत आहेत. शिवाजी महाराजांचे विचार आणि महात्मा फुले यांचे सामाजिक समतेचे तत्वज्ञान यांचा संगम समाजाला न्याय, समता आणि बंधुतेचा मार्ग दाखवणारा ठरत आहे.
शिवजयंती निमित्ताने समाजातील सर्व घटकांनी शिवाजी महाराजांच्या लोककल्याणकारी विचारांचा आणि महात्मा फुले यांच्या समतेच्या संदेशाचा अंगीकार करण्याचे आवाहन करण्यात येत आहे.