फुले-शाहू-आंबेडकरी विचारांच्या जपणुकीसाठी केलेल्या कार्याची दखल….
कंधार :
सामाजिक परिवर्तनाच्या चळवळीत निष्ठेने काम करणाऱ्या आणि समाजातील वंचित घटकांच्या प्रश्नांसाठी सातत्याने आवाज उठवणाऱ्या घोडज येथील युवा सामाजिक कार्यकर्ते रूपेश कांबळे यांना ‘छ. राजर्षी शाहू महाराज समाज भूषण पुरस्कार २०२६’ जाहीर झाला आहे. अण्णा भाऊ साठे पीपल्स फोर्सच्या वतीने देण्यात येणारा हा पुरस्कार सामाजिक क्षेत्रातील उल्लेखनीय योगदानाची राज्यस्तरीय पावती मानला जात आहे.
समाजातील अन्याय, शिक्षण, सामाजिक जागृती, संविधान विचार आणि फुले-आंबेडकरी चळवळीच्या मूल्यांवर आधारित कार्य करणाऱ्या व्यक्तींना दरवर्षी हा सन्मान प्रदान केला जातो. यंदा रूपेश कांबळे यांच्या सातत्यपूर्ण सामाजिक कार्याची दखल घेत निवड समितीने त्यांची निवड केली आहे.
संस्थेच्या अधिकृत पत्रानुसार, सामाजिक, राजकीय, शैक्षणिक, वैचारिक, सांस्कृतिक आणि कलात्मक अशा विविध क्षेत्रांमध्ये निस्वार्थ भावनेने काम करणाऱ्या व्यक्तींचा गौरव करण्यामागे संस्थेचा उद्देश आहे. रूपेश कांबळे यांनी ग्रामीण भागातील युवक, विद्यार्थी आणि सामाजिक प्रश्नांवर केलेले जनजागृतीपर कार्य, विविध उपक्रमांतून समाजाला दिलेले योगदान आणि परिवर्तनवादी विचारांचा प्रचार यामुळे त्यांची या पुरस्कारासाठी निवड झाल्याचे सांगण्यात आले आहे.
अण्णा भाऊ साठे पीपल्स फोर्सचे संस्थापक बा.रा. वाघमारे, प्रदेशाध्यक्ष डी.एस. वाघमारे तसेच जिल्हाध्यक्ष नामदेव कांबळे यांच्या स्वाक्षरीने निवडीचे पत्र जारी करण्यात आले आहे. हा पुरस्कार सोहळा छत्रपती राजर्षी शाहू महाराज जयंतीनिमित्त शुक्रवार दि. २६ जून २०२६ रोजी दुपारी १२ वाजता नवीन नांदेड येथे आयोजित करण्यात आला आहे. यावेळी राज्यभरातील विविध क्षेत्रांत उल्लेखनीय कार्य करणाऱ्या मान्यवरांचा गौरव करण्यात येणार असल्याची माहिती देण्यात आली.
सन्मानचिन्ह आणि प्रशस्तीपत्र असे पुरस्काराचे स्वरूप असून, सामाजिक बांधिलकी जपत काम करणाऱ्या कार्यकर्त्यांसाठी हा सन्मान प्रेरणादायी मानला जात आहे. विशेष म्हणजे, ग्रामीण भागातून सामाजिक चळवळीमध्ये सक्रिय राहून स्वतःची वेगळी ओळख निर्माण करणाऱ्या रूपेश कांबळे यांच्या निवडीमुळे घोडज व कंधार तालुक्याच्या सामाजिक क्षेत्रालाही एक नवी ओळख मिळाल्याची भावना व्यक्त होत आहे.
दरम्यान, त्यांच्या निवडीचे वृत्त समोर येताच विविध सामाजिक संघटना, युवक, कार्यकर्ते आणि नागरिकांकडून अभिनंदनाचा वर्षाव सुरू झाला आहे. “हा पुरस्कार केवळ एका व्यक्तीचा सन्मान नसून सामाजिक परिवर्तनासाठी काम करणाऱ्या विचारांचा गौरव आहे,” अशा भावना अनेकांनी व्यक्त केल्या.